कोशी प्रदेशका मुख्य मन्त्री केदार कार्कीज्यू,

प्रदेश तथा स्थानीय जनप्रतिनिधिहरू,

आज सम्मानित तथा पुरस्कृत हुनुभएका महानुभावहरू,

सञ्चारकर्मीहरू, र

कार्यक्रममा उपस्थित सम्पूर्ण दिदीबहिनी तथा दाजुभाइहरू ।

विराटनगरबाट प्रकाशित हुने स्थानीय समाचारपत्र न्यू सृष्टि दैनिकले आफ्नो१३औँ वार्षिकोत्सवको अवसरमा ज्येष्ठ नागरिक अभिनन्दन तथा सामाजिक जीवनका विविध क्षेत्रमा उत्कृष्ट कार्य गर्नुहुने महानुभावहरूको सम्मान तथा पुरस्कार वितरण कार्यक्रमको आयोजना गरेकोमा मलाई खुसी लागेको छ ।

एक सञ्चार माध्यमको रूपमा न्यू सृष्टि दैनिकले आम नागरिकमा सूचना सम्प्रेषण गर्ने व्यवसायिक जिम्मेवारीका अतिरिक्त शिक्षा, स्वास्थ्य, उद्योग/व्यापार, सुशासन, पत्रकारिकता, कला, साहित्य, सङ्गीत एवं खेलकुद लगायतका क्षेत्रमा विशिष्ट योगदान गर्नुहुने व्यक्तित्वहरूलाई सम्मान एवं पुरस्कृत गर्ने कार्यको म हृदयदेखि सराहना गर्दछु । साथै, यस्तो महत्वपूर्ण कार्यक्रम आयोजना गरेकोमा म आयोजकहरूलाई हार्दिक धन्यवाद दिन चाहन्छु ।

हाम्रो देशको सन्दर्भमा, सूचना प्रवाह मार्फत विकास कार्यमा सामुदायिक संलग्नता बढाउन र सामाजिक–आर्थिक विकासमा योगदान पुर्‍याउन स्थानीय पत्रपत्रिकाहरूले महत्वपूर्ण भूमिका खेल्न सक्दछन् । यस्ता समाचारपत्रहरूले स्थानीय घटनाहरू, शैक्षिक अवसरहरू, स्वास्थ्य सेवासम्बन्धी पहलहरू र सरकारी कार्यक्रमहरूको बारेमा जनतालाई सूसुचित गर्दछन् ।

यस्ता सञ्चारमाध्यमहरूले समुदायका लागि वकालत गर्ने, स्थानीय मुद्दाहरूलाई प्रकाशमा ल्याउने, प्राकृतिक एवं सांस्कृतिक सम्पदाको प्रवर्द्धन गर्ने र विविध जातजाति, भाषाभाषी र संस्कृति अवलम्बन गरेका समुदायका बिचमा आपसी सहिष्णुता र एकताको भावना अभिवृद्धि गर्ने काममा योगदान गर्न सक्दछन् । साथै, स्थानीय प्रेसले सार्वजनिक पदमा रहेका अधिकारीहरूलाई जवाफदेही बनाउँदै र मुलुकमा सुशासनको प्रवर्द्धन र लोकतान्त्रिक प्रक्रियामा समेत उल्लेखनीय योगदान पुर्‍याउन सक्दछन् ।

न्यू सृष्टि दैनिकले पनि विगत एक दशकभन्दा अघिदेखि एक जिम्मेवार स्थानीय सञ्चार माध्यमको रूपमा सरकार र नागरिकहरूको बीच प्रभावकारी सञ्चार पुलको रूपमा काम गरिरहेको छ भन्ने मलाई लागेको छ ।

कोशी प्रदेशको राजधानीको रूपमा रहेको विराटनगर पौराणिक, ऐतिहासिक, आर्थिक, राजनीतिक एवं शैक्षिक हिसाबले नेपालको एक महत्वपूर्ण सहर हो । हालसम्म मुलुकलाई चारजना प्रधानमन्त्री दिन सफल विराटनगरको नेपालको लोकतान्त्रिक आन्दोलनमा समेत उत्तिकै महत्वपूर्ण भूमिका रहँदै आएको छ । तथापि, केही दशक अघिसम्म देशको प्रमुख औद्योगिक केन्द्रको रूपमा  राष्ट्रिय अर्थतन्त्रमा ठुलो योगदान गर्दै आएको विराटनगरले पछिल्ला वर्षहरूमा आफ्नो पहिचान कायम राख्न सङ्घर्ष गरिरहेको कुरामा हामी सबै विदितै छौँ ।

महाभारतकालीन राजा विराटसँग समेत सम्बन्धित रहेको यस सहरले नेपाली सभ्यता र संस्कृतिको निर्माणमा समेत महत्वपूर्ण भूमिका खेल्न सक्दछ । यस सन्दर्भमा, विराट राजाको दरबार रहेको स्थान भनिएको भेडियारी क्षेत्रमा भइरहेको पुरातात्विक उत्खनन कार्यलाई पूर्णता दिँदै यस क्षेत्रको ऐतिहासिकताको वैज्ञानिक निरुपण गरिनु पर्दछ ।

यसरी नै, मैले विराटनगरको ऐतिहासिक गौरवलाई कायम राख्दै वर्तमान समयमा यस सहरको मौलिक पहिचान दर्साउने प्रतीकात्मक संरचनाको निर्माणको आवश्यकता रहेको कुरा यस अघिदेखि नै उठाउँदै आएको छु र यसलाई आज म पुन: दोहोर्‍याउन चाहन्छु ।

कोशी प्रदेश सहित समग्र मुलुकको उद्योग, व्यापार, कृषि र पर्यटन क्षेत्रको विकास र विस्तारको लागि ज्यादै महत्व राख्ने राष्ट्रिय गौरबको आयोजनाको रूपमा रहेको विराटनगरदेखि सखुवासभाको किमाथाङ्का जोड्ने उत्तर दक्षिण कोशी राजमार्गको निर्माण यथाशीघ्र सम्पन्न गरिनु पर्दछ । यो राजमार्गमार्फत हामी उत्तर र दक्षिणका हाम्रा दुई छिमेकी मुलुकहरूसँग व्यापार विस्तार गरी अर्थतन्त्रलाई थप सुदृढ गर्न सक्दछौँ । यी विषय लगायत यस क्षेत्रका विकाससम्बन्धी जनचासो र सरोकारका यावत् विषयहरूमा यहाँका स्थानीय सञ्चार माध्यमहरूले सूचना संप्रेषणका साथै निरन्तर रूपमा सार्वजनिक बहस सञ्चालन गर्नु पर्दछ भन्ने मलाई लाग्दछ ।

न्यू सृष्टि दैनिकले सामाजिक जीवनका विविध क्षेत्रमा अनुकरणीय काम गर्नुहुने व्यक्तित्वहरूका साथै ज्येष्ठ नागरिकहरूलाई सम्मानित र पुरस्कृत गर्ने कार्यबाट आ–आफ्ना क्षेत्रमा थप उत्साहका साथ काम गर्न सबैलाई प्रेरणा मिल्नेछ भन्ने मैले विश्वास लिएको छु ।

अन्तमा, आज पुरस्कृत र सम्मानित हुनु भएका सम्पूर्ण व्यक्तित्वहरूलाई म हार्दिक बधाई दिन चाहन्छु । साथै, कार्यक्रमको आयोजक एवं न्यू सृष्टि दैनिकका प्रकाशक एवं प्रधान संपादक खरेल सहित न्यू सृष्टि दैनिकका सम्पूर्ण टिमलाई हार्दिक धन्यवाद सहित उत्तरोत्तर प्रगतिको कामना गर्दछु ।

 धन्यवाद ।

२०८० माघ २६ गते