आज नोभेम्बर २५ तारिख । यस दिनलाई ‘महिलाविरुद्ध हुने हिंसा निर्मूलनसम्बन्धी अन्तर्राष्ट्रिय दिवस’का रूपमा विश्‍वभर मनाइँदैछ भने नोभेम्बर २५ देखि डिसेम्बर १० सम्म सञ्चालन गरिने ‘लैङ्गिक हिंसा विरूद्धको १६ दिने अभियान’ पनि आजबाट सुरु भएको छ ।

हाम्रो देशमा लैङ्गिक समानता र महिला अधिकारका लागि भएका विभिन्न आन्दोलन‚ सामाजिक जागरण एवं सचेतना अभियानको परिणामस्वरुप संवैधानिक, कानुनी र संरचनागत व्यवस्थाहरू गरिएपछि राजनीति‚ प्रशासन र अन्य सार्वजनिक क्षेत्रहरूमा महिलाहरूको सहभागितामा उल्लेख्य वृद्धि हुनाको साथै महिलाको सामाजिक–आर्थिक अवस्था क्रमशः सुधारोन्मुख रहेको छ । तथापि, समाजमा विद्यमान अन्धविश्वास, पछौटेपन र सचेतनाको अभावका कारण बालविवाह‚ बहुविवाह‚ दाइजो, तिलक तथा छाउपडी प्रथा‚ बोक्सीको आरोप जस्ता विभेदजन्य कुप्रथाहरू पूर्ण रूपमा निर्मूल गर्न हामीले अझै सकेका छैनौँ । त्यसैगरी घरेलु हिंसा, यौन दुर्व्यवहार‚ एसिड आक्रमण, महिला बेचबिखन, बलात्कार र हत्या जस्ता महिलाविरुद्ध हुने हिंसाजन्य घटनाहरू समेत दैनिकजसो घटिरहेका छन् । साथै, प्रविधिका माध्यमबाट महिलाविरुद्ध हुने हिंसा तथा शोषणका नयाँ स्वरूपहरू समेत प्रकट भैरहेका छन् ।

महिलाविरुद्ध हुने सबै प्रकारका विभेद र हिंसा अन्त्यको लागि कानुनमा उल्लेखित दण्ड र सजायको प्रभावकारी कार्यान्वयन गर्दै यस प्रकारका विकृति र विसंगतिका विरुद्ध व्यापक रूपमा सचेतना अभियान सञ्चालन गर्नु आवश्यक छ । यस प्रकारका दिवस एवं अभियानहरूबाट महिलाविरुद्ध हुने विभेद र हिंसाको विषयमा जनचेतना अभिवृद्धि गर्न महत्वपूर्ण सहयोग पुग्दछ ।

यस दिवसबाट लैङ्गिक हिंसा अन्त्यको लागि क्रियाशील सबैलाई थप उत्साहका साथ काम गर्न प्रेरणा प्राप्त हुने विश्वास व्यक्त गर्दै ‘लैङ्गिक हिंसा विरूद्धको १६ दिने अभियान’को सफलताको कामना गर्दछु ।

धन्यवाद ।

२०८० मङ्सिर ९ गते शनिबार ।